«جنة» ضحية سيدة المترو تروي تفاصيل الاعتداء عليها

روت «جنة» التي تعرضت للسب من سيدة في المترو في الواقعة المعروفة إعلاميًا بسيدة المترو تفاصيل الواقعة، مشيرة إلى أن رئيس مباحث شرطة النقل والمواصلات تواصل معهم وأخبرهم بضرورة تحرير محضر: «لما قولنا له إن احنا مكناش عاوزين نأذي الست واستكفينا بإن الفيديو انتشر وقولنا خلاص ومش عاوزين نعمل محضر وعفا الله عما سلف، وقال الموضوع كبر منكم وبقا أكبر من إنكم توافقوا أو ترفضوا وإنتو لازم تيجوا تعملوا محضر».

وأوضحت جنة خلال أن هذه الواقعة حدثت الساعة 10.30 مساء في عربة المترو الخاصة بالسيدات، مضيفة: «كنا في الجامعة وصاحبتنا التالتة مكانتش معانا وخلصنا جامعة وقولنا هنفطر مع بعض وصاحبتنا جت تفطر معانا وخلصنا اليوم وكنا مروحين وركبنا المترو».

جنة: لابسة تيشرت فضفاض وبنطلون جينز

وتابعت: «لما ركبنا المترو أنا وصاحبتي اللي معايا في الجامعة قاعدين وصاحبتنا التالتة واقفة قدامنا وبتتكلم والست كانت قاعدة جنبنا لكن مش لازقة فينا بس في نفس الكرسي وصاحبتي كانت واقفة والست بتقول لها انتي لمي كتافك دي احنا في رمضان والشباب كلها طالعة نازلة بتبص عليكي وصاحبتي كانت لابسة تيشرت فضفاض وبنطلون جينز ومكناش لابسين كات زي ما بيقولوا احنا مش باينين في الفيديو لاننا احنا اللي كنا مصورينه».

جنة: الست شتمت صاحبتي بألفاظ خارجة

وعن رد فعل صديقتها قالت جنة: «صاحبتي قالت لها أنا شايفة إن لبسي مفيهوش حاجة غلط عشان هما يبصوا عليا، هما اللي هياخدوا الذنب ولو لبسي وحش قوي يقدروا يغضوا بصرهم وأنا شايفة إن لبسي مفيهوش حاجة»، لافتة إلى أن السيدة سبتها بألفاظ خارجة و«خلعت الشبشب وعايزة تضربها بيه»، وأنهم بعدها بدأوا تصويرها بعدما حذروها من إمكانية الإبلاغ عنها بواسطة الفيديو وردت السيدة عليهم: «أنا اللي هبلغ عنكم وأعمل لكم قضية دعارة»وبدأت السيدة الهجوم عليها ومنعها السيدات في المترو.