أشرف زكي: محمد رمضان نجم.. والجمهور بيطلب أغانيه

علَّق الدكتور أشرف زكي، نقيب المهن التمثيلية، على الانتقادات التي وجهها علاء سلامة وكيل نقابة الموسيقيين، لقرار منح الفنان محمد رمضان تصريحًا بالغناء.. مؤكدًا أن رمضان له جماهيرية كبيرة.

وتابع نقيب الممثلين: «لما بيكون عضو نقابة عايز ياخد تصريح من نقابة تانية لازم النقابة اللي بينتمي ليها في الأساس هي اللي تخاطب النقابة التانية عشان يقدر ياخد التصريح، ودا اللي عملناه مع محمد رمضان هو كان محتاج تصريح للغناء، وإحنا اديناله التصريح دا».

واستطرد زكي: «ليه علاء سلامة بيلومنا؟ دا شيء قانوني وطبيعي وبنعمله على طول، ورأينا في موهبة الفنان دا لينا لكن المهم رأي الجمهور، ومحمد رمضان له جمهور كبير، وخصوصًا في الحفلات، واحنا لازم نحترم رغبات الجمهور، وفي النهاية إحنا منقدرش نتجاهل جماهيريته».

وفي وقت سابق علق علاء سلامة، وكيل نقابة المهن الموسيقية، على غناء محمد رمضان، وحصوله على تصريح للحفلات، قائلًا: «محمد رمضان عنده موهبة كبيرة في التمثيل، لكنه مش موهوب في الغنا، وأنا مش معترف بيه كمطرب، ولو كنت قائم على لجنة العمل في النقابة لن أعطيه تصريح للغناء».