عندى أنيميا حادة وجالى سكر من حرقة الدم.. ريهام سعيد تكشف نتيجة تحاليلها

كشفت الإعلامية ريهام سعيد من خلال فيديو بثته لايف عبر حسابها الرسمي على موقع فيس بوك عن إصابتها بمرض السكري، وذلك بعدما أكدت في بداية الفيديو أن الصحة هي أهم شيء في الحياة بشكل عام، ولابد للجميع من الاهتمام بها، مؤكدة أنه لابد لأي شخص من الاهتمام بنفسه قائلة : "خلال هذا الفيديو أقوم بتأنيب نفسى جامد، وأعتذر لنفسى، لأن انت بتبقى عايز تبان قوي وجامد ومش عايز تهزك وبتاخد ضربات من حتت كتير ورغم انك مش فاهم ليه بس بتكون متأكد انك لازم تستحمل".

وأضافت "طلع ان كل ده بييجي على صحتك وحياتك، وبقول كده علشان لسه جايبه دلوقتى التحاليل بتاعتي، ولاقيت تحاليلي مفيش أوحش من كده الحمد، عندي انيميا حادة، وحاجات كتير ومنها اللى ضايقني أوي ان طلع عندي السكر".

ثم استكملت "اكتشفت دلوقتى ان جالي السكر، ودي حاجة لا الوم عليها غير نفسى، لأن انا اللى حملت نفسى فوق طاقتى، السكر ده حاجة بشعة بيعمي العينين، وبيبوظ السنان، ولازم تحارب وما تاكلش حاجات معينة، لازم ما تزعلش، لازم تلعب رياضة كتير".

كما قالت خلال الفيديو "سمحت لناس يضايقوني طوال 20 سنة بدون وجه حق، وسمحت لنفسي بغبائي إني أضايق نفسي، لكن جاء الوقت اللي أخلي بالي فيه من نفسي وأوفر وقت كتير لي من غير أولادي أو شغلي ومن غير ما أهتم مين اللي بيتبلى عليّ ومين اللي بيهاجمني.. ربنا ينصرني على أعدائي اللي معرفش هم أعدائي ليه، ومش ذنبي إني ناجحة وأن اسمي رنان".

واختتمت: "لما وصلتني التحاليل حبيت أقولهم خلوا بالكم من نفسكم ومفيش حاجة في الدنيا مستاهلة لأن كل حاجة هتعدي، وما تاخدوش فوق طاقتكم، لأن ربنا عارف أنه بيدي كل واحد حاجة عارف إنه هيتحملها.. ما تضايقوش نفسكم أبدًا".