كهربا: مش همشي من الأهلي حتى لو مش عاوزني

قال محمود عبدالمنعم كهربا لاعب النادي الأهلي، إن مستقبله وختام مسيرته في الملاعب سيكون داخل النادي الأهلي ومع جمهوره، موضحًا: «لسه عندي 27 سنة وقدامي 10 سنين في الكورة، ومش طالع من النادي الأهلي أصلا».

وأضاف «كهربا» في حواره مع الإعلامية بسمة وهبة مقدمة برنامج «العرافة»، على قناة «المحور»، أنه لا يشعر بالغيرة من أي لاعب يتألق في النادي الأهلي: «أنا بقرب منهم، سواء أحرز هدفا أو لعب بشكل جيد أو عاد من إصابة، مع إني محتاج اللي يدعمني».

وتابع محمود عبدالمنعم كهربا: «أنا لسه ما لعبتش، وكل اللي بلعبه ربع أو نص ساعة، وبعمل حاجة أحرز هدفا أو أصنع آخر»، مشيدا بطاهر محمد طاهر وجونيور أجاي لاعبي الفريق في مركز الجناح: «مش شايف حد أحسن مني، وعن قرار المشاركة فهو في يد المدير الفني، واللي هيأدي الجمهور هيشيله، هستنى وهتحمل وعمري ما همشي من النادي الأهلي حتى لو هم مش عاوزيني».

وحول إضاعته ركلة جزاء عندما كان يلعب مع الزمالك ضد الأهلي، في مباراة السوبر المصري، التي خسرها الزمالك بثلاثة أهداف لهدفين، قال: «كان يوم أسود في حياتي، وعمري ما فرحت إني ضيعت عشان أنا أهلاوي، عمري ما أخون ناس أمنتني أبدا».

وواصل: «عمري ما بغير من أي لاعب، ومعروف في الوسط الرياضي كله إني عمري ما غيرت من حد، جوه أو بره الملعب».