بعد تصريحات حمو بيكا.. حسن شاكوش: عمري ما احتاجت لحد حتى لو هشحت وساكت علشان أكل العيش

وجه مطرب المهرجانات الشعبية حسن شاكوش، رسالة شديدة اللهجة لـ مهاجميه، مؤكدًا أنه ليس لأحد فضل عليه في الوسط الفني، وأنه فقط ممتنع عن الحديث حتى يوجه تركيزه على أعماله الفنية فقط.

وقال حسن شاكوش في لايف عبر حسابه الشخصي بموقع تيك توك: اللي هيطلع بعد كدة ويجيب سيرتي في حاجة، أنا سايبك لما تشوفني تقولي حبيبي ولما حد يخبط فيا تشيرله وأنا عمري ما احتاجت حاجة من حد في الشغلانة دي حتى لو هشحت.

وتابع: أي حد هيطلع يجيب سيرتي في أي برنامج أنا مابعتمدتش حد في الشغلانة دي ومش معنى كدة أني غلبان ومبتكلمش، لا أنا ساكت بس عشان أكل العيش وعشان أنا محترم مع الناس وأنت عارف.

وأضاف: أنت عايزني أجيب سيرتك عشان تتشهر وتشتغل أنت مش هتشتغل، ودماغي لما بتهرب مني اللي بيجي على سكتي بدوسه، لو خيالك فكر إنك تطلع تتكلم عليا تاني لو كان راجل كبير أو صغير بتكلم في المجال مش بره لو خيالك وزك.

حمو بيكا: أنا المدرسة اللي طلعت حسن شاكوش

سبق وتحدث مؤدي المهرجان حمو بيكا، عن حسن شاكوش موضحًا أنه سبب شهرة شاكوش، وذلك خلال حواره في برنامج العرافة، قائلًا: أنا المدرسة اللي طلعت حسن شاكوش، هو مكنش عنده استوديو وهو بيحط ممول عشان أغانيه تجيب مشاهدات، أول أغنية عملتها لحسن شاكوش جابت 15 مليون مشاهدة، وأنا اللي طلعته للنور ولما اشتهر والغرور خده مني بقى يعمل أغاني لوحده.

وتابع: حسن شاكوش بيحب السهر مش بيحب الشغل.. أنا بشتغل مش بسهر وهو مش مركز في شغله.. أنا العالم كله يعرفني ولكن هو لأ.. وساب مراته وراح بيسهر ومراته بتنصحه بتقوله انزل اشتغل.

كما علق حمو بيكا، على تصريحات حسن شاكوش بأن حفل زفافه تكلف 4 ملايين جنيه، قائلًا: فرح حسن شاكوش متكلفش 4 مليون جنيه ده كذاب، اتكلف 300 ألف جنيه.. وفرحي اتكلف 50 ألف جنيه وبعد ما عملت جمعية.